O‘zbekiston — Shvesiya: parlamentlararo hamkorlik aloqalari yanada mustahkamlanadi

2021-yil 11-may kuni parlament quyi palatasida O‘zbekiston Respublikasi Oliy Majlisi va Shvetsiya Riksdagi parlamentlararo hamkorlik guruhining uchrashuvi videokonferensaloqa shaklida o‘tkazildi.

Unda do‘stlik guruhiga a'zo deputatlar, Shvetsiya Riksdagining Markaziy Osiyo mamlakatlari parlamentlari bilan hamkorlik guruhi raisi Xanna Vesteren rahbarligidagi do‘stlik guruhlari a'zolari ishtirok etishdi.

Uchrashuvda Oliy Majlis Qonunchilik palatasining Xalqaro ishlar va parlamentlararo aloqalar qo‘mitasi raisi Dilorom Fayzieva tomonidan palata faoliyati, siyosiy partiyalar fraksiyalari, shuningdek 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi hamda O‘zbekiston Respublikasi Prezidenti Shavkat Mirziyoyevning Oliy Majlis va xalqimizga yo‘llagan Murojaatnomasi asosida bugungi kunda olib borilayotgan islohotlar to‘g‘risida batafsil ma'lumotlar berildi.

Muloqotda ikki tomonlama hamkorlikni yanada rivojlantirish, inson huquqlari, gender tenglik sohalarida muntazam tajriba almashib borishga kelishib olindi. Shuningdek, Shvetsiya parlamenti vakillari O‘zbekiston Respublikasi va Yevropa Ittifoqi o‘rtasida kengaytirilgan xamkorlikni yo‘lga qo‘yishda amaliy yordam berishini hamda qo‘llab-quvvatlashini bildirib o‘tdilar.

Suhbat chog‘ida Shvesiya Riksdagi vakillari O‘zbekistonda o‘tkaziladigan Prezident saylovida kuzatuvchi sifatida ishtirok etishga qiziqish bildirishdi.

Uchrashuvda ikki tomonlama hamkorlikni kengaytirishda parlamentlararo aloqalarni yanada chuqurlashtirish muhimligi ta'kidlandi. Muloqot yakunida parlamentlararo muloqotni turli darajada faollashtirish, ikki tomonlama va xalqaro kun tartibidagi dolzarb masalalar bo‘yicha doimiy maslahatlar olib borilishiga kelishib olindi. Bu borada aniq chora-tadbirlar to‘g‘risida takliflar berildi va o‘zaro hamkorlikda “yo‘l xaritasi” ishlab chiqilishi va amalga oshirilishiga kelishildi.