O‘zbekiston tarixda birinchi marta Xalqaro mehnat tashkiloti Maʼmuriy kengashiga aʼzo bo‘ldi
Ovoz berish natijalariga ko‘ra, O‘zbekiston eng ko‘p ovoz to‘plagan
“Dunyo” axborot agentligining xabariga ko'ra, 7 iyun kuni Xalqaro mehnat tashkilotining (XMT) Jenevadagi bosh-qarorgohida Xalqaro mehnat konferensiyasining 112-konferensiyasi doirasida 2024-2027 yillar uchun tashkilot Maʼmuriy kengashi aʼzolari va ularning o‘rinbosarlariga saylov bo‘lib o‘tdi.
Ovoz berish natijalariga ko‘ra, O‘zbekiston eng ko‘p ovoz (194 ta, zarur minimum 105) to‘plagan holda, o‘z tarixida birinchi marta XMT Maʼmuriy kengashiga aʼzo o‘rinbosari etib saylandi.
O‘zbekistonning Maʼmuriy kengashga saylanishi tarixiy voqea hisoblanadi, chunki O‘zbekiston tomoni XMTning ushbu asosiy organiga birinchi marta aʼzo bo‘lmoqda.
Ovoz berish yakunlari shuni ko‘rsatdiki, XMTga aʼzo davlatlar mamlakatimizda bolalar va majburiy mehnatga barham berish, xalqaro mehnat sohasidagi qator muhim konvensiyalarni ratifikatsiya qilish, munosib mehnat tamoyillarini ilgari surish, muammolarni eʼtiborsiz qoldirish siyosatidan ularni muloqot orqali hal etish kabi ko‘rilayotgan islohotlarga baho beradi.
Boshqaruv organi XMTning ijro etuvchi organi hisoblanadi. Xalqaro mehnat konferensiyasi sessiyalari orasidagi davrda tashkilot ishiga rahbarlik qiladi va uning qarorlarini amalga oshirish tartibini belgilaydi. Maʼmuriy kengashning har yili uchta sessiyasi - mart, iyun va noyabr oylarida o‘tkaziladi.
Maʼmuriy kengash uch yil muddatga saylanadigan 56 nafar aʼzo va 66 nafar o‘rinbosardan iborat.
